Edukimi në vazhdim duket një sfidë e humbur nga shqiptarët.
Një raport i Fondacionit Europian të Trajnimeve për vitin 2022 ka nxjerr në pah se vetëm 0,7% e popullsisë 25-64 vjeç në vendin tonë kanë marrë pjesë në një trajnim që ka të bëjë me përditësimin e njohurive.
Ky ishte niveli më i ulët rajonal, pasi në Serbi gati 6% e kësaj grupmoshe ndjek trajnime, në Malin e Zi 3,2%, në Maqedoninë e Veriut 2.5% dhe në Bosnjë 1.8%. Ndërkohë në Bashkimin Europian, më shumë se 11% e popullsisë 25-64 vjeç morën pjesë në trajnime në vitin 2022.
Ekspertët e Komisionit Europian vlerësojnë të rëndësishëm mësimin gjatë gjithë jetës në kontekstin e zhvillimeve teknologjike dhe demografike.
Grupmosha 25-64 vjeç në vendin tonë vuan nga deficite të mëdha në arsim. Të dhënat nga Fondacioni Europian i Trajnimeve tregojnë se në vitin 2020 gati 53 % e popullsisë mbi 15 vjeç kishte vetëm arsim fillor. Niveli i ulët i arsimit në popullsinë në moshë pune nuk po bëhet shtysë për përmirësimin e aftësive në vijim.
Një anketë e INSTAT ka nxjerr në pah se kostot për trajnimin profesional në vitin 2020 u ulën në raport me vitin 2016 nga 19-90% në varësi të aktiviteteve ekonomike.
Në vitin 2020, kosto vjetore e trajnimit të një punonjësi në këto biznese ishte vetëm 734 lekë nga 7290 lekë që ishin në vitin 2016, me rënie 90%.
Bizneset pothuajse investojnë shumë pak fare te burimet njerëzore dhe nuk përdorin instrumente stimuluese si bonuse, shpërblime dhe trajnime për të rritur profesionalizimin
Tani, kur teknologjia është duke ndryshuar qasjen ndaj profesioneve, nevojitet përditësim i njohurive në të gjitha fushat për t’u përshtatur me risitë./Euronews.al